សិង្ហបុរី៖ ពិធីរត់ភ្លើងគប់កីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ត្រូវប្រារព្ធធ្វើឡើងនៅប្រទេសសិង្ហបុរី នាព្រឹកថ្ងៃទី១៥ ខែមេសា ឆ្នាំ២០២៣ ដែលបានបញ្ចប់ទៅ ប្រកបដោយភាពជោគជ័យ។

ព្រះអគ្គីជ័យកីឡា និងភ្លើងគប់ ត្រូវបានប្រតិភូបេសកជនពិសេស នៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ និងកីឡាប៉ារ៉ាហ្គេម លើកទី១២ ដឹកនាំដោយ រដ្ឋលេខាធិការក្រសួងទេសចរណ៍លោក ហោ សារុន និង ឯកអគ្គរាជទូតកម្ពុជាប្រចាំនៅប្រទេសសិង្ហបុរីលោក សុខ ខឿន និង រដ្ឋមន្រ្តីក្រសួងវប្បធម៌ សហគមន៍ និងយុវជន និងជាអនុរដ្ឋមន្រ្តីច្បាប់សិង្ហបុរី Edwin Tong និងវត្តមានរបស់កីឡាករ កីឡាការិនីសិង្ហបុរី ប្រមាណជាង៥០០នាក់ ផងដែរ។

លោក ហោ សារុន បានថ្លែងថាពិធីដង្ហែព្រះអគ្គីកីឡានាថ្ងៃនេះបានបង្ហាញឲ្យឃើញពីទំនាក់ទំនង និងកិច្ចសហប្រតិបត្តិការរវាងកម្ពុជា និងសិង្ហបុរី ខណៈព្រះអគ្គីកីឡាគឺជានិមិត្តរូបនៃថាមពល មិត្តភាព សាមគ្គីភាព និងនិរន្តរភាព ដែលទាំងអស់នេះជាតម្លៃសកលនៃទំនាក់ទំនងរវាងការប្រកួតកីឡា និងការរស់នៅប្រចាំថ្ងៃ។

លោកបានបន្តឱ្យដឹងថា អស់រយៈពេល ៦៤ឆ្នាំហើយ ចាប់តាំងពីព្រឹត្តិការណ៍ស៊ីហ្គេមលើកទី១ ក្នុងឆ្នាំ១៩៥៩ ដែលកម្ពុជាបានរង់ចាំ ឱកាសធ្វើជាម្ចាស់ផ្ទះដោយក្នុងឆ្នាំ ២០២៣ គឺជាឆ្នាំដ៏វិសេសវិសាលសម្រាប់កម្ពុជា ហើយនៅសល់តែ ២៤ ថ្ងៃទៀត ប៉ុណ្ណោះដែលកម្ពុជានឹងធ្វើជាម្ចាស់ផ្ទះជាផ្លូវការលើកដំបូងរបស់ខ្លួន។

គួរឱ្យដឹងដែរថា ភ្លើងគប់កីឡានឹងបន្តដង្ហែទៅប្រទេសថៃ មីយ៉ាន់ម៉ា ព្រុយណេ និងឡាវ ហើយនឹងបន្តដង្ហែមកកម្ពុជាវិញនៅថ្ងៃទី២៧ ខែមេសា ឆ្នាំ២០២៣ ដោយដង្ហែជុំវិញបឹងទន្លេសាបមុនឡើងមកដល់ពហុកីឡដ្ឋានជាតិមរតកតេជោ នៅថ្ងៃទី៥ ខែឧសភា ឆ្នាំ២០២៣ ដែលជាថ្ងៃបើកការប្រកួតកីឡាស៊ីហ្គេម-ប៉ារ៉ាហ្គេម៕